Friday, November 12, 2010

வ - குவார்ட்டர் கட்டிங் - விமர்சனம்



குவார்ட்டர்....   குவார்ட்டர்....  குவார்ட்டர்.... உச்சரிக்கும் போதே உள் நாக்கு இனித்து ஒரு மாதிரி கிளு கிளுப்பாக இருக்கிறதல்லவா... தமிழனுக்கு ரொம்பவே பிடித்த  ஆங்கில வார்த்தை.   இப்படி ஒரு அழகான.. அம்சமான தலைப்பை வைத்துக்கொண்டு புகுந்து விளையாடி இருக்க வேண்டாமா... ? ம்ம்ஹூம்... ஆட்டோவில் கெட்ட ஆட்டம் போட்டவர்கள் குவார்ட்டரில் மட்டையாகி விட்டார்கள்.

முதலில் இந்த படத்திற்கு ஒளிப்பதிவு செய்த நீரவ் ஷாவிற்கு ஒரு புல் பக்கார்டி பார்சல். மனுஷன் ரசித்து ருசித்து  செய்திருக்கிறார். அந்த மஞ்சள் கலர் டோனும்,  கேமரா கோணங்களும் ரொம்பவே புதுமை + இனிமை.

விடிந்தால் துபாய் செல்லும் விமானம்.. அங்கு போனாலோ சரக்கடிக்க முடியாது.. ஆசை தீர இங்கு சரக்கடிக்கலாம் என்றால் தேர்தல் நேரம் காரணமாக டாஸ்மாக் அத்தனையும் விடுமுறை.  மனதை சிறிதும் தளர விடாமல் தேடுதல் வேட்டை தொடங்கும் விக்கிரமாதித்தனாக சிவா.. அவர் முதுகில் தொங்கும் வெள்ளை வேதாளமாக  கொழுக் மொளுக் SPB சரண்.  அதிரி புதிரியான லைன் தான். கடைசியில் சிவா குவார்ட்டரை அடித்தாரா இல்லையா என்பதை அவர்கள் சொல்லி முடிப்பதற்க்குள், கடுப்பில்  நாம் ஒரு குவார்ட்டரை அடித்தே ஆக வேண்டும் என்கிற எண்ணம் ஏற்படுவது மட்டும் நிச்சயம்.


சரக்கடிக்க குறைந்த பட்ச தேவையாய் இருக்கும் ஊறுகாய் அளவிற்கு கூட திரைக்கதை இல்லாதது படத்தின் பெரும் பலவீனம். ஒரே இரவில் நடக்கும் கதை. ஆனால் நின்று போன கடிகாரம் போல படம் ஒரே இடத்தில் ஆணி அடித்து  நிற்கிறது. இத்தனை நீளமான இரவை  ஷகிலா படத்தில் கூட பார்த்ததில்லை. 

பாரில் சைடு டிஷ்ஷாக  கொடுக்கும் பாப்கார்ன் போல குட்டி குட்டி கதாபாத்திரங்கள்  படம் முழுதும் ஏராளமாய் உலாவுகின்றன.  யார்.. எதற்கு என்று ஒரு காரண காரியமும் இல்லை. அழுத்தம் அற்ற கதாபாத்திரங்கள் மூலம் தண்ணி போடாமலேயே படம் தள்ளாட்டம் போடுகிறது.

அதே அலட்சிய சிவா.. கோயம்புத்தூர் தமிழில் கபடி ஆடுகிறார். சிரிக்காமல் இவர் அடிக்கும் கமெண்டுகள் சில இடங்களில் சுவாரசியம்.  மாட்டு டாக்டராக வரும் SPB  சரணின் வாய்ஸ் மாடுலேஷன் சிம்ப்ளி சூப்பர்.   ஹீரோயின் என்ற பெயரில் லேகா வாஷிங்டன். பீரில் இருக்கும் ஆல்கஹால் அளவிற்கு கூட படத்தில் இவரின் பங்களிப்பு இல்லை. இவருக்கு பதிலாக இன்ஸ்பெக்டர் சிங்காரி கூட பார்க்கும் போதெல்லாம்  கிக் ஏற்றுகிறார்.


வெறும் வசனங்கள் மூலம் படத்தை நகர்த்தி செல்ல முயன்றிருக்கிறார்கள் புஷ்கர்  காயத்ரி தம்பதியினர்.  ஒரு காட்சியில் வில்லன், சிவா கையே பிடித்து திருக..அதற்க்கு சிவா சொல்லும் டயலாக் படு சூப்பர். ஆனால் காட்சிபடுத்தலில் விஷயம் ஏதும் இல்லாததால்  விடிய விடிய  புல் அடித்தும் மப்பு ஏறாத மனநிலைதான் படம் பார்க்கும் நமக்கு ஏற்படுகிறது.

புஷ்கர் காயத்ரி BETTER LUCK NEXT TIME.

(+) பிளஸ் 

நீரவ் ஷா ஒளிப்பதிவு
வசனங்கள்
வித்தியாசமான கதை சொல்லும் முயற்சி

(-) மைனஸ்

திரைக்கதை
ஒட்டாத கதா பாத்திரங்கள்
மொக்கையான காட்சியமைப்புகள்


VERDICT  :  HANG OVER
RATING    : 3.8/10.0

EXTRA பிட்டுகள் :

பாதி படத்திலேயே நம் மக்கள் கூச்சல் போட ஆரம்பித்து விட்டார்கள். முதல்ல இவனுக்கு ஒரு குவார்ட்டரை வாங்கி கொடுத்து படத்தை முடிங்கடா என்று ஓவர் கூச்சல். 

3 comments:

  1. நண்பா..இந்தப்படம் விமர்சனம் எழுதக்கூட தகுதி இல்லாதது...ஏ..போட்டு..எழுதீட்டு இருகீங்க..

    ReplyDelete
  2. //சரக்கடிக்க குறைந்த பட்ச தேவையாய் இருக்கும் ஊறுகாய் அளவிற்கு கூட திரைக்கதை இல்லாதது படத்தின் பெரும் பலவீனம்.//

    படத்துக்கேத்த வரிகள்.... படத்தைவிட உங்க விமர்சனம் தூக்கல்

    ReplyDelete

you might like this also...

Related Posts with Thumbnails