Sunday, May 20, 2012

நொறுக்கு தீனி - 4 (20.05.12)

 
தத்து பித்து


out of form -  இந்த வார்த்தை கிரிக்கெட்டில் மட்டுமல்ல... வாழ்கையிலும் அவ்வப்போது இயல்பாய் நிகழக்கூடிய ஒன்று. சில சமயங்களில்,  எல்லாம் வெறுத்து.. என்னடா வாழ்க்கை இது என நினைக்க தோணுமே... அதேதான்! எல்லாம் நல்லபடியாகத்தான் சென்று கொண்டிருக்கும்... தீடிரென ஒரு வெறுப்பு...குழப்பம்.. .தினசரி நடவடிக்கைகளில் ஒரு ஈடுபாடு இல்லாமை... ஒரு தேக்கம்... ஒரு speed breaker போல...  எல்லோரும் சில சூழ்நிலைகளில் சந்திக்கும் பிரச்சனை இது. நன்றாக எழுதிக்கொண்டிருப்போம்.. .தீடிரென  எந்த இழவுமே தோன்றாது. வீம்புக்காய் எழுதினாலும்.. எழுதிய பின் படித்து பார்த்தால்....  நாமே காறி துப்பலாம் போல அவ்வளவு கன்றாவியாய் இருக்கும். out of form. எழுத்தாளன், நடிகன்,  விளையாட்டு வீரன்... சராசரி மனிதன் என பாகுபாடின்றி எல்லோரும் சந்திப்பது...


 தீர்மானிக்க முடியா ஒரு புதிர்தான் வாழ்க்கை.. நாளை என்ன நடக்கும் என்று ஒருத்தனுக்கும் தெரியாது...  நாளை பற்றிய ஒரு எதிர்பார்ப்பு இல்லாமல் தேமேயென சொங்கி போக வைக்கும் இந்த பிரச்சனைக்கு தீர்வு சொல்வதல்ல இந்த பதிவின் நோக்கம்.. பிரச்சனை எனக்கும் இருக்கிறது என ஒப்புக்கொள்ளவே...


விகடன் பக்கம்


கொரநாட்டுக்கருப்பூர் தியாகராசனை இனி தன் வாழ்நாள் முழுக்க மறக்கமாட்டார் கார்டூனிஸ்ட் கம் எழுத்தாளர் மதன். தான் விளையாட்டாய் கேட்ட கேள்வி இந்த அளவிற்கு வினை வைக்கும் என்று  பாவம் அந்த தியாகராசனும் நினைத்திருக்கமாட்டார். இந்த வார முதல் அதிர்ச்சி... விகடனில் மதன் கார்ட்டூன் இல்லை... அப்படியே அடுத்த பக்கத்தை திருப்பினால்... பேரதிர்ச்சி... .இனிமேல் மதனே, விகடனில் இல்லை. என்ன கன்றாவிடா இது... பிரச்சனையே அலசி பார்த்தால் இருவரது கருத்துக்களிலுமே  நியாயம் இருக்கிறது. விகடனில் ஒரு கார்டூனிஸ்ட்டாக தன் வாழ்க்கையே தொடங்கி... விரல் பிடித்து நடந்து.. தன் தனித்துவமான திறமையால் கொஞ்சம் கொஞ்சமாய் வளர்ந்து...நல்ல எழுத்தாளராய் மிளிர்ந்து...  மிக நீண்ட வாசகர் வரிசையே  பெற்றவர் மதன்...  விகடனில் வெளிவரும்   ஒவ்வொரு மதன் கார்ட்டூனும் நம்மை உடனே சிரிக்க வைத்து அடுத்த நொடியே கொஞ்சம் சிந்திக்கவும் வைக்கும். அதே போல அவரது ஹாய் மதன் கேள்வி பதில் பகுதி.. சுஜாதா சாரின் ஏன் எதற்கு எப்படி போலவே நகைச்சுவை கோட்டிங் தடவிய  பொது அறிவு  புதையாலாய் இருக்கும். இனி அவை எதுவும் இல்லை என்பதே மிக ஏமாற்றமாக இருக்கிறது. ஆசையாய் கொஞ்சிக்கொண்டிருந்த  பொம்மை பிடுங்கப்பட்ட குழந்தையின் மனநிலை போலவே! கொஞ்சம் காலமாகவே மதனுக்கும் விகடனுக்கும் ஒரு சுமூகமான உறவு இல்லை  என்பது இலை மறை காய் மறையாய் இருந்து வந்தது. விகடன் ஆசிரியர் இலாகாவில் இருந்து அவர் விலக்கப்பட்டது முதல் படி... இப்போது இரண்டாம் படி... மிக பலமாய்... இனிமேல் விகடன் அலுவலக படியே ஏற முடியாதபடி...  


மதனுக்கு ஒரு மதிப்புமிக்க சிம்மாசனத்தை கொடுத்திருந்த விகடன் இப்படி பொசுக்கென பிடுங்கிகொள்ளுமென அவரது வாசகர்கள் யாரும் எதிர்பார்த்திருக்கமாட்டர்கள்.

மதன் இல்லாத விகடன் இனிமேல் எப்படி இருக்கும்?  கால மாற்றங்களுக்கேற்ப தன்னை புதிது புதிததாய் வடிவமைத்துக்கொள்வது விகடனின் ஸ்பெஷாலிட்டி. நிறைய முறை நான் இதை உணர்ந்திருக்கிறேன்.. குறும்பு டீம் என விகடனில் ஒரு பகுதி சக்கை போடு போட்டது அந்த காலங்களில்.... தீடிரென அது நின்று விட்டது.. அது போலத்தான் 'விகடன் டாப் ' பகுதியும்.. இளசுகளின் யதார்த்த குறும்புகளாய் நீண்ட காலம் வசீகரித்து வந்தது.. அதுவும் பொசுக்கென ஒரு நாள் நின்றது. அது போல விகடனில் தொடர்ச்சியாய் எழுதி வந்த  சுஜாதா சாரின் மறைவால் உண்டான   வெற்றிடம்.. இதனால்  விகடன் படிக்கும் ஆர்வம் குறைந்தது ஒன்று அல்லது இரண்டு வாரங்கள் மட்டுமே.. அதை விட சிறப்பாய் வேறு விஷயங்களை தேர்ந்தெடுத்து விடுவதில்தான் விகடனின் கெட்டிக்காரத்தனம் ஒளிந்திருக்கிறது.  so, மதன் இல்லாத குறையே மிக எளிதாக விகடன் மறக்கடித்து விடும்.

விகடன் இல்லாத மதன் இனிமேல்... ?  வாழ்க்கை என்னும் கடலில்... விகடன் என்னும் மதிப்பான கப்பலில் பயணம் செய்து கொண்டிருந்த மதன் லைப் போட் கூட இல்லாமல் கப்பலில் இருந்து இறக்கிவிடப்பட்டிருக்கிறார். ஆனால் என்ன... நீச்சல் தெரிந்த நல்ல திறமைசாலிதான் மதன்.... எழுத்தாளர்  ஞானிக்கு  நடந்தது போலவே... விகடன் கை விட்டாலும்.. கை கொடுக்க ஏகப்பட்ட பத்திரிக்கைகள் இருக்கின்றன. தன் எழுத்தின் மூலம் தன் வாசகர் வட்டத்தை அவர் தக்கவைத்துக்கொள்ளலாம். ஜெயா டிவி சினிமா விமர்சனம்.. ரியாலிட்டி ஷோ நீதிபதி என பன்முகம் காட்டி விகடன் இல்லாத தன் பிந்தைய காலத்தையும் அவர் பிசியாக்கிகொள்ளலாம். 


ஆனால் விகடன் மற்றும் மதன் வாசகர்கள்....?  உண்மையிலேயே மிகப்பெரிய நஷ்டம் நமக்குதான். வோட்டு போட்ட ஏழை மக்கள் போல... என்ன செய்ய... மாற்றம் ஒன்றே மாறாதது.




இசை...

"நீதானே என் பொன்வசந்தம்" மியூசிக் பிட் யு ட்யூபில் கிடைக்கிறது.. அடங்கொக்க மக்க... அந்த ட்ரம்ஸ் மற்றும் கிட்டார் பீட்டில் பின்னி பெடல் எடுக்கிறார் ராஜா சார். பாடல்களை கேட்க மனசு தவமாய் தவமிருக்கிறது.
தடையற்க தாக்க படத்தில் தமனின் இசையில் வரும் இரண்டு  பாடல்கள் ... very impressive...  "காலங்கள்" மற்றும் "கேளாமலே"  இரண்டுமே நல்ல வித்தியாசமான முயற்சி. 


சோகம்


விளம்பரங்களில் " I Love You Rasna" என நம் கவனம் ஈர்க்கும் அந்த வசீகர  (தருணி சச் தேவ்) முகம்,  டிவி பார்க்கும் நம்  எல்லோருக்கும்  பரிச்சயம். உலகின் கொடுமையான விஷயங்களில் ஒன்று.. ஏதும் அறிய இளம் பிஞ்சுகள் பலியாவதுதான். நேபாளத்தில் நடந்த விமான விபத்தில்... நம் தமிழர்கள் பலியான செய்தியே  மட்டும் வெளிச்சம் போட்டு கட்டிய நம் மீடியாக்கள் இந்த குழந்தையே பற்றி ஏதும் சொல்லாதது இன்னமும் கொடுமை. 



IPL அட்டகாசங்கள்


IPL 20  ஓவர் போட்டிகள், ஒரு பரபரப்பான சினிமா பார்க்கும் அனுபவத்தை கொடுக்கின்றன.. மைதானத்திற்கு உள்ளே அல்ல. .. வெளியே..!.. கற்பழிப்பு புகார்கள்.. மேட்ச் பிக்சிங், ஷாருக்கான் அடிதடி என கண்டபடி களை கட்டி ஒரு த்ரில்லர் கம் அக்ஷன் படம் பார்ப்பது போல இருக்கிறது. தினசரி ஆட்ட நிலவரங்களை விட்டு விட்டு  தினம் ஒரு அதிர்ச்சி செய்தி என மீடியா நமக்கு  செம தீனி போடுகிறது. சும்மாவே நாம அரைப்போம்... இதில்...  வாயில் அவலை வேறு கொட்டினால்..

Wednesday, May 16, 2012

மிக எதிர்பார்ப்புக்குரிய 10 படங்கள்

10.கும்கி

வனமும் வனம் சார்ந்த விஷயங்களும் எப்போதுமே அலுக்காதவை...   காட்டுக்குள்  ஒரு ட்ரெக்கிங் போகும் உற்சாகத்தை கொடுத்த மைனாவின்  கதை களம்தான்  அதன்  வெற்றிக்கு முக்கிய காரணம். அதே குளு குளு மலை சாரலின் பின்னணியில் பிரபு சாலமனின் அடுத்த படம். வித்தியாசமான   முயற்சிகளுக்காக மெனக்கெடும் பிரபு சாலமனுக்கு எட்டாக்கனியாக இருந்த வெற்றி மைனாவின் மூலமாய் கிடைத்ததை கும்கி தக்க வைத்துக்கொள்ளுமா என்பதை பார்ப்போம்.  கதையின் முடிவு ட்ராஜிடியாய் இருக்க வேண்டும் என்பதற்காக... கிளைமாக்சில், ஹீரோயினை... யானை தூக்கி வீசி பந்தாடாமல் இருந்தால் சரி. 



09.தாண்டவம்

எதை தின்றால் பித்தம் தெளியும் என்ற நிலையில் இருக்கும்   விக்ரமிற்கு இந்த படமாவது ஆறுதலை தருமா  என்பதுதான் இப்போதைய  மில்லியன் டாலர் கேள்வி. என்னதான் உயிரை கொடுத்து நடித்தாலும் நடிக்கிற படங்கள் எல்லாம் பப்படம் ஆகிக்கொண்டு வருவதை சீயான் உணர்ந்திருப்பார் போல... அதுதான் ஷங்கரை தேடி சென்று வாய்ப்பை கேட்டு பெறுமளவிற்கு செய்திருக்கிறது. சினிமாவில் ஒரு ஹிட் எல்லாவற்றையும் புரட்டி போட்டு விடும். மதராசபட்டினத்தில் சுவாரசியமான திரைக்கதை செய்த மேஜிக், அதற்க்கு ஈடுகொடுத்த ஜி.வீ  பிரகாஷ் இசை, நீரவ் ஷா ஒளிப்பதிவு என அதே டீம் இதிலும் கை கோர்த்திருப்பதால் வெற்றி வசமாகும் என்று நம்பலாம். எல்லாவற்றிற்கும் மேல் அனுஷ்கா இருக்காங்க..... ஹி... ஹி... 


08.பில்லா 2


MGR படுத்துக்கொண்டே தேர்தலில் ஜெய்த்தது போல அஜீத் நடந்து நடந்தே வெற்றியடைந்த முதல் பாகத்தில் அதன் ஸ்டைலிஷான மேக்கிங்கிற்கு உறுதுணையாய் இருந்த விஷ்ணுவர்த்தன் - நீரவ்ஷா கூட்டணி இதில் இல்லையென்றாலும் TRAILER கொடுக்கும் இம்பாக்ட் அதிர வைக்கிறது.  உன்னை போல் ஒருவனில் கவனம் ஈர்த்த சக்ரி முழுசாய் இயக்கம் செய்திருக்கும் படம் என்பதால் ஆர்வத்திற்கு  குறைவில்லை. 


07.மாற்றான்


சூர்யா என்றாலே... "சரியான விடை.. உறுதிப்பணம் பத்தாயிரம் என சிரித்துக்கொண்டே HI டெசிபலில் முழங்கும்   "நீங்களும் வெல்லலாம் ஒரு கோடி நிகழ்ச்சியே மறந்து ... மாற்றான் சூர்யாவை ரசிக்க  முடியுமா என்னும் கேள்விக்கு பதில் சொல்ல வேண்டிய பொறுப்பு கே.வீ  ஆனந்தின் தலையில் வந்து அமர்ந்திருக்கிறது. ஹீரோக்களை நம்பாமல் ஸ்க்ரிப்ட்டை நம்பும் இயக்குனர் என்பதால்  வெற்றி வசமாகும் வாய்ப்பு அதிகமாகவே இருக்கிறது. 
06.துப்பாக்கி

முந்தைய படம் தமிழர்களை எந்தளவிற்கு புல்லரிக்க வைத்தது என்பதை அதன் நெகட்டிவ் ரிசல்ட்கள்  அதன் இயக்குனர்க்கு நன்கு உணர்த்தியிருக்கும். பூக்கடைக்கு விளம்பரம் தேவை இல்லை. நன்றாக தயாரித்த படைப்பு விளம்பரம் இல்லாமலேயே வெற்றியே பறிக்கும் என்பதை ஏ.ஆர். முருகதாஸ் உணர்ந்திருந்தால் இந்த படம் நிச்சயம் நமக்கு செம தீனிதான். ஒளிப்பதிவு சந்தோஷ் சிவன் என்பது இப்படத்தின் மதிப்பை இரண்டுபங்கு உயர்த்துகிறது.


05. இரண்டாம் உலகம்

புரிந்து கொள்ளவே முடியாத விசித்திர மனிதர்களில் செல்வராகவனும் ஒருவர். அவரது படைப்புகளும் அவரை போலவே... கொஞ்சம் ஜீரணிக்க நேரம் எடுத்துக்கொள்ளும் வகை. இருந்தாலும் ஒவ்வொருமுறையும் அவரது அடுத்த படைப்பு குறித்த ஒரு எதிர்பார்ப்பு இயல்பாகவே நம்முள் வந்து ஒட்டிக்கொள்ளும். அதுத்தான் ஒரு படைப்பாளியின் மிக சிறந்த வெற்றி. இரண்டாம் உலகமும் சொல்ல முடியா ஒரு ஆர்வத்தை தூண்டியிருப்பதை மறுக்க முடியாது. முதன் முறையாக ஹாரிசுடன் கை கோர்த்திருப்பது ஒரு புதிய இசைக்கான வாய்ப்பாக இருக்க கூடும்... ரசிகர்களுக்கும்... முக்கியமாக ஹாரிசுக்கும்.


4 . முகமூடி


ஏகப்பட்ட தயாரிப்பாளர்கள் கைகளுக்கு மாறி மாறி சென்று இப்போது முகமூடி U டிவி வசம். இத்தனைக்கும் மிஸ்கின் ஒன்றும் கண்டபடி பட்ஜெட் உயர்த்தி தயாரிப்பளருக்கு வாந்தி பேதி கொடுக்கும் ரகமல்ல... இருந்தும் அவரது எல்லா படங்களுக்கும் தயாரிப்பாளர்கள் வாய்க்காதது  ஒரு நல்ல படைப்பாளியின் துரதிர்ஷ்டம் என்றே சொல்ல வேண்டும். தனது எல்லா படங்களிலும் நம்பும் படியான லாஜிக்கை பின்பற்றும் மிஸ்கின் இந்த சூப்பர் ஹீரோ படத்தில் லாஜிக்கிற்கு எந்த அளவு முக்கியத்துவம் கொடுத்திருப்பார் என்பதே இப்போதிய எதிர்பார்ப்பு. 



3. நீதானே என் பொன் வசந்தம்


படம் ஆரம்பித்த போது இல்லாத பரபரப்பு... படத்தின் இசை ராஜா  என்றவுடன் பற்றிக்கொண்டது... அப்போது இருந்து இப்போது வரை படத்தின் மீது அளவில்லாத காதலில் இருக்கிறார்கள் இசை ரசிகர்கள்... ஒரு நல்ல இசை.. ஜீவனை மயக்கும்... உருக்கும்... அதிலேயே கரைய செய்யும்.. அந்த அனுபவத்திற்காக..மூன்று தலைமுறையும் காத்துக்கொண்டிருக்கிறது... இன்ப தேன் வந்து பாய்ந்திடும் காதினிலே... என...  


2.கடல்

மணிரத்னம் என்னும் மந்திரசொல்... ரஹ்மான் என்னும் மந்திர சாவி.. வார்த்தைகளில் சொல்ல இயலா சிலிர்ப்பும்... ஆர்வமும் ஒவ்வொரு மணி சார் படங்கள் தொடங்கும் போதும் தமிழ் ரசிகனுக்கு கிடைப்பவை. ஆனால் படம் பார்த்ததும்  அது பணால் ஆவதுதான் தொடரும் சோகம். பிராந்திய மொழி நடிகர்கள்.. பிராந்திய தேசத்தில் திருநெல்வேலி பாஷை பேசுவதை ஏற்றுக்கொள்ள முடிவதில்லை வாத்தியாரே... மணி சார் படங்கள் என்றாலே ஷார்ட் அண்ட் ஸ்வீட் வசனங்கள்தான் ஹீரோ. சுஹாசினி வந்து அதற்கும் வேட்டு வைத்தார் முந்தைய படத்தில்.  எந்த அளவிற்கு எதிர்பார்ப்பு இருக்கிறதோ... அந்த அளவிற்கு பயமும் இருக்கிறது கடல் மீது... காப்பாற்றட்டும் கடவுள். 


1 . விஸ்வரூபம்

தமிழன் எதோ ஒரு புண்ணியம் செய்திருக்கிறான். அதனால்தான்  கமல் மாதிரியான படைப்பாளிகள் தமிழில்  இருக்கிறார்கள். புது புது பரிசோதனை முயற்சிகளால் தன்னையும் தன சொத்துக்களையும் கரைக்கும் கமல்... தன் ரசிகனுக்கு கொடுக்கும் புது புது அனுபவங்கள்தான் இன்னமும் கமல் மீது அதீத எதிர்பாப்பை கொடுத்துக்கொண்டிருக்கிறது. மார்க்கெட்டிங் சாகசங்களுக்காக  ஹிந்தி இசையமைப்பாளர்களுடன்  கை கோர்ப்பதுதான் ஒரு நெருடல். பார்க்கலாம்.. விஸ்வரூபம் என்ன மாதிரியான அனுபவத்தை கொடுக்கிறது என...
 

Sunday, May 13, 2012

நொறுக்கு தீனி - 3 (13.05.12)



வாரா வாரம் ஆரவாரமாய் எழுத வேண்டும் என தொடங்கியது இந்த பகுதி... என் சோம்பேறித்தனமா.....இல்லை உங்கள் நல்ல நேரமா என தெரியவில்லை... இவ்வளவு நாள் எழுதாமல்,  அதிகம் படிக்காமல் விட்டதால்,  மண்டையில் ஒட்டடை படிந்து நானே.... எதோ பழசான பொருளாய் மாறிப்போனது போல ஒரு உணர்வு. இனியும் நேரம் கடத்துவதாய் இல்லை.

வாழ்க்கை ஒரு வட்டம்டா.....

மெட்ராஸ் வெய்யிலில் வருபட்டுக்கொண்டிருப்பவனுக்கு கோயம்புத்தூர்காரனை பார்த்தால் ஒரு ஆதங்கம்.. இவனுக மட்டும் மேற்கு தொடர்ச்சி மலை அடிவாரத்துல குளு குளுன்னு வாழ்ந்துட்டு இருக்கானுக.. சிறுவாணி தண்ணி குடிச்சுட்டு குஷியா இருக்காங்கன்னு.. கோயம்புத்தூர் காரனுக்கு மெட்ராஸ் காரனை பார்த்தால் ஒரு கோபம்.. .. இவங்களுக்கு  மட்டும் ரெண்டு மணி நேரம் மட்டும் பவர் கட். ஆனா நமக்கு  எட்டு மணி நேரம்...  என்ன கொடுமை டா... ராமான்னு.. இந்த ரெண்டு பேரையும் பார்த்துட்டு நக்கலா ஒரு சிரிப்பு சிரிக்கிறான் புதுக்கோட்டை காரன்.. எங்களுக்கு பவர் கட்டே கிடையாது... வெயில் அடிச்சாலும் சில்ல்ன்னு பீர் குடிக்க இலவசமா வீட்டுக்கு வீடு காசு வேற தராங்கனு...  

ரயில் வருது... ரயில் வருது...



ஒரு நகரின் உண்மையான வளர்ச்சி என்பது... அதன் உள்கட்டமைப்பு வசதிகளின் விஸ்தாரத்தை பொறுத்தே தீர்மானிக்கப்படுகிறது.. சென்னையில் இருக்கும் மக்கள் தொகைக்கும், போக்குவரத்து நெரிசலுக்கும் மெட்ரோ ரயில் இரண்டு மூன்று வருடங்களுக்கு முன்பாகவே வந்திருக்க வேண்டிய விஷயம். எல்லாமே சரியாக நடந்தால்.. அடுத்த ஆண்டு இறுதியில்(2013)  தமிழனும் மெட்ரோ ரயிலில் சவாரி செய்யும் சாதனை நிகழலாம். நிகழவேண்டும்...  மனித  வாழ்வில்.. இழந்தால்    ஈடு கட்ட முடியாதது நேரம் தான். அதை மிச்சம் செய்து கொடுக்கும் இந்த மாதிரி வசதிகள் தான் எல்லா நகரங்களுக்கும் தேவை.

 
விகடன் பக்கம்

இந்த வார விகடன்ல... 'சாந்தி' னு ஒரு சிறுகதை..... 'சாதத் மஹத் மண்டோ'ன்னு  இந்தியாவின் பிரபலமான ஒரு எழுத்தாளர் எழுதியது... ஆரம்பத்துல ஒரு மாதிரி குன்சா போனாலும்... கிளைமாக்ஸ் அட்டகாசம். ஒற்றை வரியில்  சிலிர்ப்பான ஒரு அனுபவத்தை தர்றார்... தலைவர் சுஜாதா போலவே.....

அப்புறம்.. "நிறைய நீர் கொஞ்சம் விஷம்' னு சமஸ் எழுதின ஒரு கட்டுரை.... குறிப்பிட வேண்டிய ஒன்று.  பீர் குடிச்சா கூட ஒன்னும் ஆகாது போல... ஆனா நாம குடிக்கிற தண்ணியில் கலந்திருக்கும் பிரச்சனைகளை இவர் சொன்ன விதம்.. நிஜமாவே பயமுறுத்துது...

வழக்கு படத்திற்கு இவ்வளவு மார்க் விகடன் அள்ளி தரும்னு எதிர்பார்க்கலை. 55/100.

இசை...

ஏற்கனவே மைனாவில் கேட்ட மாதிரி இருந்தாலும், மனம் கொத்தி பறவையில்... "ஜல் ஜல்" பாடலும், "என்ன சொல்ல" பாடலும் பிரமாதம்...இமான் அடிச்சு துவைச்சு காய போட்டிருக்கிறார்.

அதே போல.. கிருஷ்ணவேணி பஞ்சாலை படத்தில் வரும் " உன் கண்கள்" பாடல் அட்டகாசமான மெலடி. கேட்டுக்கொண்டே இருக்கலாம்.
எதிர்பார்ப்பு 


கடல்...... இந்த சிம்பிளான ஸ்டில் கூட ஏகத்துக்கும் எதிர்பார்ப்பை தூண்டுது... மணி சார்... மொத்த இந்தியாவுக்கும் படம் எடுக்காம.. தமிழ் நாட்டுக்கு மட்டும் பொருந்துற மாதிரி அழகா எடுக்க எல்லாம் வல்ல பிலிமானந்தாவை வேண்டிக்கொள்கிறேன்.


 

Monday, May 7, 2012

வழக்கு எண் 18/9 - விமர்சனம்



வாழ்வியல் யதார்த்தங்களை மீறிய மிகைபடுத்தப்பட்ட சம்பவங்களும், கற்பனை கூட செய்து பார்க்க முடியா தனி மனித சாகசங்களுமாய் நிரம்பி வழிந்து கொண்டிருக்கிறது தமிழ் சினிமா.. இந்த பொய் பிம்பங்கள் யாவும் உண்மை என நம்மை  நம்ப வைத்து  நம் மூளை மழுங்க செய்து, அதன் போதையிலேயே கனவில் வாழ்க்கை நகர்த்த வைக்கும் வியாபார சினிமா தந்திரங்களுக்கு  மத்தியில் இந்த மாதிரி படங்கள் கடவுள் போல... காணக் கிடைக்கா வரம்.  தரையில் கால் வைத்து நடப்பதுதான் யதார்த்தம்.  இந்த படைப்பு உங்கள் கை விரல் பிடித்து இரண்டரை மணி நேரம் வாழ்வின் யதார்த்த அழகியலையும், அவலத்தையும் ஒருங்கே காட்டிச்செல்கிறது. 

ஒரு படத்தின் தரம் என்பது,   ஐம்பது கோடி, நூறு கோடி பட்ஜெட், ஸ்டார்  வேல்யு,  ஹை டெக் டெக்னாலஜி,  வெளிநாட்டு லொக்கேஷன்கள் போன்றவைதான் என  தீர்மானிக்கும் கூட்டங்களுக்கு நடுவே, எந்த விதமான பிரம்மாண்டங்களும், ஸ்டார் வேல்யுவும் இன்றி,  அறிமுக நடிகர்களை கொண்டு,  அற்புதமாக  கதை சொல்லியிருக்கும் பாலாஜி சக்திவேல் உலக சினிமா இயக்குனர்கள் வரிசையில் தானும் வரும் தகுதியே வளர்த்துக்கொண்டிருக்கிறார். 



விகடனில், "ஒரு நல்ல சினிமா எப்படி இருக்க வேண்டும் ? என்கின்ற கேள்விக்கு... மஹ்சன் மக்மல்பப் எனும்
ஈரானிய இயக்குனர்  சொன்ன வார்த்தைகள் நினைவுக்கு வருகின்றன...   "மக்களை பற்றி பேசுகிற எந்த படமும் நல்ல படம்தான்".   ஒரு சூப்பர் ஹீரோ.. அவர் செய்யும் குரங்கு சேட்டைகள்,  சாதனைகள், வில்லன்களை துவம்சம் செய்தல்.. கிடைக்கின்ற இடைவெளியில், வெளுப்பான ஹீரோயினின் இடை வளைத்து  காதல் செய்யும்  கன்றாவி படங்களுக்கு மத்தியில்.. ஹீரோ, ஹீரோயின் என எந்த விதமான அடையாளங்களும்  இன்றி, எளிமையான மனிதர்களை பற்றி பேசும் இந்த படம் தமிழ் சினிமாவின் முக்கியமான ஆவணம்.

 ஒரு பெண்,  முகத்தில் ஆசிட் அடிக்கப்பட்டு ஆபத்தான நிலையில் மருத்தவமனையில் சேர்க்கப்படுகிறாள், அதனை தொடர்ந்து வரும் போலீஸ் விசாரணை பயணத்தில், ஒரு ஏழையின் காதலும், பணத்திமிர் பிடித்த ஒரு வர்கத்தின் குரூரமும் ஒரே புள்ளியில் இணைய.. முடிவு என்னவென்பதே கதை. 




மிக எளிமையான கதைதான்..... ஆனால் திரைக்கதையில் அதற்காக மெனக்கெட்டிருக்கும் உழைப்புதான்... ஷங்கர்  படங்களிலும்   கண்டிராத ஒரு  பிரமிப்பை  தருகிறது. முன் பாதியில் நிகழும் சம்பவங்கள் யாவும், பிற்பாதியில்  வேறொரு பார்வையில்  கமல்ஹாசனின் விருமாண்டி பட ஸ்டைலில் அட்சரம் பிசகாமல் மீண்டும் ஒரு முறை கடந்து போவது அபாரம்.

எதிர்பார்ப்புகளால்  நிரம்பியதுதான் மனித வாழ்க்கை.. இப்படத்தில் வரும் எல்லா மனிதர்களுக்குள்ளும் ஒரு எதிர்பார்ப்பு இருக்கிறது..... காதல்... காமம்.... அங்கீகாரம்.... அளவில்லாத பணம் என்று.... எல்லாம் முடிந்து வீழ்ந்த பின்னும்.. காதல் மட்டுமே அப்படியே மிச்சமிருப்பதாய் நம்மை உணரசெய்யும் அந்த இறுதிக்காட்சி கவிதை.

  ஒரு மழை தூறும் சாயங்கால வேளையில், பால்கனியில் அமர்ந்துகொண்டு,   காதல் மனைவி போட்டுகொடுத்த  அற்புதமான  தேநீரை  சுவைத்துக்கொண்டே நா. முத்துகுமாரின் காதல் கவிதைகளை படிக்கும் போது கிடைக்கும் ஒரு சுகானுபவம், " ஒரு குரல்  கேட்குது முன்னே" பாடலின் விஷுவல் கவிதைகளை பார்க்கும்போதும்  கிடைக்கிறது.  படத்தில்  இம்மாதிரி அழகிய காற்று போல நம்மை கடந்து செல்லும் விஷயங்கள்  ஏராளம்.



 
ஸ்டில் காமெராவில் எடுக்கப்பட்டாலும், அதன் அழகும்,  நேர்த்தியும் அவ்வளவு தரம்.  புதுமுகங்களா... என வியந்து ஆச்சரியப்படும் அளவிற்கு, படத்தில் வாழ்ந்திருக்கும் ஒவ்வொரு கதாபாத்திரமும் அவை செதுக்கப்பட்ட  விதமும்... சிற்பி கையில் கிடைக்கும் போதுதான் கல் சிலையாகிறது. 

பின்னணி இசை உறுத்தாமல் சென்றாலும், அந்த இசை கூட இல்லமால் படம் நகர்ந்திருந்தால்  இன்னமும் உயரம் தொட்டிருக்குமோ என சின்ன சந்தேகம். ஆனால் அது ரொம்ப கஷ்டம்.... தமிழர்களாகிய நமக்கு சந்தோஷமாய் இருந்தாலும் பாட்டு வேணும். செத்தாலும் ஒப்பாரி வேணும்.

வருடத்திருக்கு ஒரு படம் கொடுத்தாலும்... பல நூறு வருடங்கள் கழித்தும் பேசக்கூடிய படங்களாய் கொடுக்க முயற்சிக்கும் பாலாஜி சக்திவேலுக்கு அழுத்தமான கை குலுக்கல்கள்.. அதி அற்புதமான வாழ்த்துக்கள்.
(+) பிளஸ் 

திரைக்கதை
கதாபாத்திரங்கள் 
யதார்த்தம்
வசனங்கள்
ஒளிப்பதிவு


(-) மைனஸ்
  
ஞாபகமில்லை. 






VERDICT : தமிழ் சினிமாவிற்கும் நமக்கும் ஒரு முக்கியமான படம் + பாடம்.

RATING : 6.5/10.0

EXTRA  பிட்டுகள்

தம்பதி சகிதமாய் படம் பார்ப்பதற்கும், நண்பர்கள் சூழ  படம் பார்பதற்கும் நிறைய வித்தியாசங்கள்.  கணவன் மனைவி சகிதம் அமர்ந்து பார்ப்பதில்
நிறைய சௌகரியங்களை இழக்க வேண்டியதாயிருக்கிறது. விசில் அடிப்பது, வாய் விட்டு சிரிப்பது... " மாமா பட்டாசுடா.. என நம் இன்ஸ்டன்ட் விமர்சனங்களை பகிர்ந்து கொள்ள நண்பர்கள்தான் உத்தமம். இதை பற்றி மேற்கொண்டு எழுதினால் இரவு போஜனம் கிடைக்காது என்பதால் இத்தோடு ஸ்டாப்.

நேற்று உதயத்தில் . . படம் சீரியசாக நகர்ந்து கொண்டிருக்க.. ஒரு காட்சியில்.. அந்த ஸ்கூல் பெண்ணின் அம்மா " ஆர்த்தி,  I GOT PROMOTION" என சொல்ல,  அடுத்த வினாடியே... "SHE GOT ABORTION" என பதிலுக்கு    ஒரு வால் பையன் தியேட்டரில் கமெண்ட்  அடிக்க... சரியான கிளாப்ஸ்.... டைமிங்  பன்ச்  அடிப்பதில் தமிழன்  தமிழன்தான்.


you might like this also...

Related Posts with Thumbnails