Saturday, December 24, 2011

ராஜபாட்டை - விமர்சனம்

நம்பிக்கையான இயக்குனர் என நம்ம்ம்ம்பி முதல் நாளே படம் பார்க்க போனால் காலை வாரி விட்டு முகத்திலேயே மிதிப்பது தமிழ் சினிமாவின் சாபக்கேடுகளில் ஒன்று. ராஜபாட்டையும் அந்த  பாதையில்... 

அழகர் சாமியின் குதிரை, நான் மகான் அல்ல.. என வித விதமான கதை களனில் கவர்ந்த சுசிந்தரன் முதல் முறையாய் வாங்கியிருக்கும் அடி... படம் பார்க்கும் நமக்கும் பார்த்து முடித்து வெளியே வரும் வரை வலிக்கிறது...

தமிழகத்தில் மோசமான வியாதியாக பரவியிருக்கும் நில அபகரிப்பு பிரச்சனைதான் கதையின் அடிநாதம். நல்ல கருதான். ஆனால் அதை சொல்லி சென்ற விதத்தில் ஒரு விவேகம் இருக்க வேண்டாமா? ஒரு மாஸ் ஹீரோவின் கால்ஷீட் இருக்கிறது என்பதற்காக தினசரிகளை மேலோட்டமாக மேய்ந்து விட்டு குத்து மதிப்பாக படம் எடுத்தால் உருப்படாது என்பதற்கு இந்த படம் நல்ல உதாரணம். 



விக்ரமை இந்த அளவு கன்றாவியாக எந்த படத்திலும் காட்டியதில்லை. அவரது  ஹேர் டிசைனருக்கு எதாவது சம்பள பாக்கியா என்ன என்பது தெரியவில்லை. ப்ளீச் செய்கிறேன் பேர்வழி என்று முடிந்தவரை அவரது இமேஜை டேமேஜ் செய்திருக்கிறார். முகத்தில் நன்கு தெரியும் சுருக்கங்களும், அவருக்கான  உடை தேர்வும்....  சீயான் இந்த படத்தில் நடித்ததை நினைத்து காலம் பூராவும் கண் கலங்க போகிறார்.

முதற்பாதி மொக்கை என்றால் இரண்டாம் பாதி படு மொக்கை. அழுத்தமில்லாத திரைக்கதையால்... நடந்தால் பாட்டு.. நின்றால் சண்டை என்று டெரர் கும்மி அடித்து பீதியே கிளப்புகிறார்கள்.
தமிழ் நாட்டையே தன் அதிகாரத்தால் கைக்குள் வைத்திருக்கும் அரசியல்வாதி வில்லி.. ஒற்றை ஹீரோவை அழிக்க லோடு லோடாக ஆட்களை அனுப்பிக்கொண்டே இருக்கிறார். அவரும் வந்தவர்களை எல்லாம் மிதி மிதி என மிதித்துக்கொண்டே இருக்கிறார். படம் பார்க்கும் நாம் டயர்டாகி போதும்டா சாமி என சொல்லும் வரைக்கும் மிதித்துக்கொண்டே இருக்கிறார். விடுங்க... நாம் பார்ப்பது தமிழ் சினிமா. உலக சினிமா இல்லை. 
ஹீரோயின்... ஆன்ட்டியா.... இல்லை நல்ல பிகர்தானா என முடிவு செய்வதற்குள் படத்தில் அவரது போர்ஷன் முடிந்து விடுகிறது. இந்த படத்தின் லவ் சீன்களை எல்லாம் சொல்ல ஆரம்பித்தால் தேவை இல்லாமல் உங்களை கெட்ட வார்த்தை பேச வைத்த பாவம் எனக்கு வந்து சேரும்.

நல்ல நடிகர்கள்... நல்ல ஒளிப்பதிவாளர், நல்ல வசனகர்த்தா, நல்ல இசையமைப்பாளர் என எல்லோரும் பாரபட்சமின்றி வீணடிக்கபட்டிருக்கிறார்கள். லட்டு போன்ற ஒரு குத்து பாடலை.... தலை முடியே பீய்த்துக்கொண்டு அவசரகதியில்   ஓடி வர வைக்கும் கேவலமான கிளைமாக்ஸ்க்கு  அப்புறம் சொருகிவிட்டிருப்பது  இயக்குனருக்கு  கற்பனை பஞ்சம் தலை விரித்தாடுவதை சொல்லாமல் சொல்கிறது.  லட்டு போன்ற ரெண்டு பிகர்கள்.. அருமையான மெட்டு... வெளிநாட்டு லொக்கேஷன்... என நிலத்தை விற்று.. நகையே விற்று... அதில்  செலவு செய்து எடுத்த பாடலை ஆளில்லாத தியேட்டரில் காண நேரும் தயாரிப்பளருக்கு நிச்சயம் ரத்த கண்ணீர் வரும். 
படத்தில் எந்த நல்ல விஷயமுமே இல்லையா என கேட்பவர்களுக்கு...  எங்கள் வாத்தியார் சுஜாதா சொல்வார், "ஒரு பியர் அடிப்பதற்கு ஒரு டாஸ்மாக்கையே வாங்க வேண்டுமா" என. அது போலத்தான், அவ்வபோது லேசாக கவரும் விஷயங்களுக்காக மொத்த படத்தையும் பார்ப்பது உங்கள் பொறுமை மற்றும் சகிப்புத்தன்மைக்கான சவால்.
 

படம் பூராவும்.. விக்ரம் தான் மலை மாடு போல புஜபலத்துடன் இருக்கிறார். கதையோ TB அட்டாக் ஆனா பேஷன்ட் போல எலும்பும் தோலுமாய் பரிதாபமாய் காட்சியளிக்கிறது.

(+) பிளஸ்
இந்த மொக்கை படத்திலும்  முழு அர்பணிப்பு காட்டிய விக்ரம். 


(-) மைனஸ்
திரைக்கதை
லாஜிக்  ஓட்டைகள்
இயக்கம்
சீட்டை பிராண்ட வைக்கும் இரண்டாம் பாதி. 


VERDICT : கசப்பான மசாலா. 
RATING    : 3.4 / 10.0


EXTRA  பிட்டுகள் 

இந்த நட்ட நடு ராத்திரியில் (மூன்று மணி) இதை எழுதுவதில் ஒரு சமூகம் சார்ந்த அக்கறை இருக்கிறது. உங்கள் பாக்கட்டில் இருக்கும் நூறு ரூபாய்
அநியாயமாக தொலைந்து போய்விட கூடாது என்கின்ற ஒரு பரிதவிப்பு இருக்கிறது. இது போன்ற மொக்கை மசாலா படங்களை  பார்ப்பதற்கு செலவிடும் நேரங்களில் நீங்கள் உபயோகமாய் உங்கள் மனைவிக்கு சமையலில் உதவலாம்.. விகடனில் ராஜு முருகன் எழுதும் "வட்டியும் முதலும்" வாசிக்கலாம். நல்ல இசையே கேட்கலாம். வேறு வேலை எதுவும் இல்லையா.. நிம்மதியாய் தூங்கலாம்.
 

Sunday, December 18, 2011

டிசம்பர் தமிழ் சினிமா இசை - ஒரு பார்வை


வருடம் முழுதும் மழை பொழிந்தாலும் ஒவ்வொரு முறையும் மேல் விழும் துளி புதிதுதான்... இசையும் அப்படிதான்.... "ச ரி க ம ப த நி" என  அதே ஏழு ஸ்வரங்கள்... ஆனால் கொடுக்கும் அனுபவங்கள் ஒவ்வொரு முறையும் புதிதுதான்....



காதல் பிரிவின் வலியில், ஒற்றை குரலாய் கேட்டு பழகிய யுவனின் குரலை ஒரு பெப்பியான டூயட் பாடலில் கேட்கவே படு  உற்சாகமாக இருக்கிறது. "பப்பபப்ப " பாடலின் மெட்டும், யுவன் ரேணு குரலில் தெறிக்கும் உற்சாகமும் 2012 ன் சூப்பர் ஹிட் பாடல் வரிசையில்  சேர்க்கும் என்பதில் ஐயமில்லை. 





இரவில் உங்கள் அன்பிற்கினியவர் மடி சாய்ந்து ஒரு தாலாட்டு கேட்கும் சுகத்தை தருகிறது " நிலா நிலா" பாடலும் "உன்னை கொல்ல போறேன்" பாடலும்.   ஹரிணி, பவதாரணி குரல்கள் கடவுளின் கொடை என்றால் அதை கேட்க வாய்த்தது நமக்கு கிடைத்த வரம். முதல் படத்திலேயே ஈர்க்க வைத்து இன்னமும் எதிர்பார்க்க வைக்கிறார் இசையமைப்பாளர் கார்த்திக்.




 ராஜாவின் எண்பதுகளின் கிளப் டான்ஸ் பாடல்களை நினைவுபடுத்தும் ஆர்க்கெஸ்ட்ரேஷன் "லட்டு லட்டு " பாடலின் மிக பெரிய பிளஸ் பாயிண்ட்.


அதே படத்தில் "பனியே பனி போலவே"  பாடலும் அடிக்கடி முனுமுனுக்க வைக்கும் ரகம்.










ஊரே "கொலை வெறி"  பாடலை கொண்டாடும் போது அதை பற்றி சொல்லாமல் போனால் செவி நிறையாது. பாடல் வரிகள் தொடங்கி இசை, பாடிய ஸ்டைல் என எல்லாமே ஒரு விதமான அலட்சிய பாவத்தில் தொடங்கினாலும் மனசு குட்டி போட்ட பூனை போல அந்த பாடலின் பின்னாலேயே  செல்கிறது என்பதை மறுப்பதிற்கில்லை. பாடலின் நடுவில் வரும் அந்த சாக்ஸபோன் இசை சத்தியமாய் DIVINE. 



 சாமியாட்டம் ஆடியிருக்கிறார்கள் டி ஆரும், L.R.ஈஸ்வரியும். தமனின் மெட்டும் சரிபங்குக்கு டெம்ப்ட் ஏற்றியதில் "கலாசலா"   பாடல் கண்டபடி வெறி ஏற்றுகிறது. செம குத்து.



G.V. பிரகாஷின் வளர்ச்சி நிஜமாகவே அபரிதமாகவே போய் கொண்டிருக்கிறது. புது புது பரிசோதனை முயற்சிகள் அவரை கவனிக்க வைக்கிறது. பொல்லாதவன் படத்தில் வந்த நீயே சொல் பாடலின் அப்பட்டமான காப்பி என்றாலும் "ஓ சுனந்தா" பாடல் அழகான ரொமாண்டிக் மூடை உண்டாக்குவது நிஜம்.

அதே போல... "மயக்கம் என்ன" வில் வரும் "பிறை தேடும் இரவினில்"   பாடல் இன்னமும் காதுகளுக்குள் ரீங்காரமிட்டுக்கொண்டிருக்கிறது. 





மொழிகளுக்கு அப்பாற்பட்டு அப்படியே ஜீவனை உருக்கி எடுக்கிறது ROCK STAR பட பாடல்கள். ஒவ்வொரு பாட்டும் ஒரு அனுபவத்தை தருகிறது.         "KUN FAYA KUN" ரஹ்மானின் அற்புதமான இசை ஞானத்தை வெளிப்படுத்தும் அழகான ஆவணம்.


"PHIR SE UD CHALA" பாடல் பல்லவி, சரணம் என எந்த எல்லைகளுக்கும் கட்டுப்படாமல் ஒரு அழகிய நதியாய் வரிகளுக்கு ஏற்றவாறு பயணம் செய்வது அத்தனை அழகு. 


"SADDA HAQ"   இசையும், வரிகளும், மொஹித் சவ்ஹானின் ஆக்ரோஷ குரலும் ஒன்றை ஒன்று போட்டி போட்டுக்கொண்டு உடலில் நுழைந்து உண்டுபண்ணும் சிலிர்ப்பை சொன்னால் புரியாது. அனுபவியுங்கள்....
 

you might like this also...

Related Posts with Thumbnails